Unibank-da Sistem Xaosu: Ödənişini Edən Müştəri Nə üçün "Borclu" Çıxarılır?

Unibank-a olan aylıq kredit və kart borcunu tam şəkildə ödəyən Əfsanə Etibar adlı müştəri, bankın xidmət keyfiyyəti və sistem boşluqları ilə bağlı ciddi narazılığını ifadə edib.

32gun.az yazır ki, uzun müddətdir ki, bankın onlayn ödəmə sisteminin işləməməsi səbəbindən ödənişlərini terminallar vasitəsilə etmək məcburiyyətində qalan vətəndaş, bu texnoloji çağda hələ də rəqəmsal xidmətlərin əlçatan olmamasını tənqid edib.

Məsələnin əsas tərəfi isə ödənişdən dörd gün sonra, yəni 10.04.2026 tarixində yaşanıb; belə ki, bankın fərqli əməkdaşları tərəfindən ard-arda zəng edilən müştəriyə ödənişin tam edilmədiyi barədə ziddiyyətli məlumatlar verilib. Əlində qəbzləri olmasına baxmayaraq, müştəri xidmətləri və qaynar xətt arasındakı informasiya fərqliliyi prosesi daha da çətinləşdirib. Şikayətçi bildirir ki, ödəniş qəbzlərini həm e-mail, həm də təqdim olunan digər əlaqə vasitələri ilə göndərməsinə baxmayaraq, bank tərəfindən hələ də şəxsi məlumatların (FİN kodun) tələb edilməsi kiber cinayətlərin artdığı bir dövrdə ciddi təhlükəsizlik sualları doğurur.

Bütün gününü bankın daxili xətalarını sübut etməyə sərf edən və həm vaxtı, həm də maddi vəsaiti (qaynar xətt xərcləri) hədər gedən müştəri, Unibank-ın sistemindəki bu boşluqların müştəri məmnuniyyətinə və etibarına ciddi zərbə vurduğunu vurğulayır. Ödənişini vaxtında edən və intizamlı müştəri olan Əfsanə Etibar, bankın bu laqeyd və nizamsız yanaşmasını sosial şəbəkələrdə paylaşaraq ictimaiyyətin diqqətinə çatdırıb.

Qeyd edək ki, Hazırda “Unibank” ASC-nin İdarə Heyəti sədrinin vəzifəsini müvəqqəti olaraq Heybət Qədirov icra edir.

Bankın əsas səhmdarı və Müşahidə Şurasının sədri isə Eldar Qəribovdur.