Mikayıl İsmayılovun keçmiş gəlini: Məni susdurmaq üçün şərləyiblər

SOCAR-ın sabiq vitse-prezidenti Mikayıl İsmayılovun oğlu Orxan İsmayılzadə ilə məhkəmə çəkişməsi davam edən Fidan Abbasova barəsində irəli sürülən narkotik ittihamlarına münasibət bildirib.

AFN.az-ın xəbərinə görə, F.Abbasova AzTimes.az-a açıqlamasında qeyd edib ki, bir neçə gün əvvəl keçmiş həyat yoldaşı O.İsmayılzadənin vəkili Şaiq Mirzəyev və onun keçmiş işçisi Əminə İsmayılzadənin şikayəti əsasında Nərimanov Rayon Polis İdarəsinin 18-ci polis bölməsinə çağırılıb. Onun sözlərinə görə, polis bölməsində narkoloji yoxlamadan keçirilib və nəticə pozitiv çıxıb.

“Lakin səhəri gün klinikada yenidən analiz verdim. Nəticələr narkotik istifadə etmədiyimi göstərdi. Analiz cavablarını da təqdim etmişəm. Hesab edirəm ki, məni susdurmaq üçün şərləyiblər. Orxan İsmayılzadə ilə övladıma atalıq hüququnun verilməsi və sənəd saxtakarlığı ilə bağlı məhkəmə çəkişməm davam edir. Bu səbəbdən mənə təzyiq göstərmək məqsədilə üzərimə narkotik ittihamı atılıb”, – deyə o bildirib.

Qeyd edək ki, Gununsesi.info-da yayılan məlumata əsasən, Fidan Abbasova İnzibati Xətalar Məcəlləsinin 206-cı maddəsi (satış məqsədi olmadan narkotik vasitələrin şəxsi istehlak miqdarında əldə edilməsi, saxlanılması və daşınması) ilə məsuliyyətə cəlb olunub. Himayəsində azyaşlı övladının olması nəzərə alınaraq, ona həbs yox, cərimə cəzası verilib. F.Abbasova qərardan apellyasiya şikayəti versə də, şikayət təmin olunmayıb.

Məsələ ilə bağlı Gununsesi.info Fidan Abbasova ilə əlaqə saxlamağa çalışsa da, onun mobil telefonuna cavab verən şəxs özünü qızı kimi təqdim edərək “Anam yatıb” deyə bildirib.

Xatırladaq ki, Fidan Abbasova ilə Orxan İsmayılzadə arasında məhkəmə çəkişməsi şəxsi münasibətlər zəminində yaranıb. F.Abbasova 2015-ci il təvəllüdlü qızının atalıq hüququnun tanınması və uşağın saxlanılması üçün aliment ödənilməsi tələbi ilə məhkəməyə müraciət edib. O, iddiasını sübut etmək üçün məhkəməyə birgə fotolar da təqdim edib.

Atalıq məsələsinin müəyyənləşdirilməsi üçün məhkəmə bir neçə dəfə ekspertiza təyin etsə da, Orxan İsmayılzadə prosesdə iştirak etməyib. Məhkəmə bunu ekspertizadan yayınma kimi qiymətləndirərək, onun 2015-ci il təvəllüdlü N.-in atası kimi tanınması barədə qərar qəbul edib və aylıq 500 manat aliment ödənilməsi öhdəliyi qoyub. Bu qərardan verilən apellyasiya şikayəti də təmin olunmayıb.

Bundan əlavə, mediada özünü Fidan Abbasovanın keçmiş rəfiqəsi kimi təqdim edən Leyla Abbasova ilə bağlı məhkəmə çəkişməsində də Apellyasiya Məhkəməsi onun iddiasını təmin etməyib. Fidan Abbasova isə bildirib ki, həmin şəxslə heç bir tanışlığı olmayıb: “Bu qadın məqsədli şəkildə mənə yaxınlaşaraq Orxan İsmayılzadəyə aid qeyri-etik videolar təqdim edib. Bu məsələ məndə ciddi narahatlıq yaratdı və aramızda münaqişə baş verdi. Sonradan onun da İsmayılzadələr ailəsinin mənə qarşı qurduğu planın bir hissəsi olduğunu düşündüm”.

F.Abbasova əlavə edib ki, onun barəsində çıxarılan məhkəmə qərarlarının mediada geniş yayılması da məqsədli xarakter daşıyır və ictimaiyyət qarşısında nüfuzdan salınmasına xidmət edir. Onun sözlərinə görə, bu iddialar Orxan İsmayılzadənin ortaq tanışlar vasitəsilə göndərdiyi mesajlarda da öz əksini tapır.