Zaurpress.az
6 ildir QALXMAYAN MAAŞ: Neftçilər çətin durumda – “Quldarlıqdır... quldurluqdur...”
Azərbaycanın strateji sahələrindən biri olan neft sektorunda çalışan minlərlə işçinin sosial vəziyyəti getdikcə daha çox narahatlıq doğurur. Xüsusilə SOCAR daxilində fəaliyyət göstərən sıravi fəhlələrin əməkhaqları ilə bağlı səsləndirilən şikayətlər son dövrlər daha da intensivləşib.
“DİA-AZ”ın məlumatına görə, Neftçilərin Hüquqlarının Müdafiəsi Təşkilatı (NHMT) tərəfindən bu məsələ dəfələrlə gündəmə gətirilsə də, aidiyyəti qurumların reaksiyası ya formal olub, ya da ümumiyyətlə müşahidə edilməyib. Nəticədə, illərlə eyni maaşla çalışan işçilər artan inflyasiya və bahalaşma fonunda ciddi sosial çətinliklərlə üz-üzə qalıb.
İşçilərdən sərt ittihamlar və narazılıq
NHMT-nin sosial şəbəkə hesabında paylaşılan müraciətlər vəziyyətin nə qədər gərgin olduğunu açıq şəkildə göstərir.
Elton İmaməliyev adlı işçi yazır ki, əmək dərəcələrinin aşağı salınması ilə yanaşı, fəhlələrə qarşı laqeyd münasibət hökm sürür:
“Bunlar fəhləyə yuxarıdan heç aşağıya da baxmırlar...”
Ariz Əliyev isə maaş artım mexanizmini ədalətsiz hesab edir:
“Əmək haqqı faizlə yox, vahid məbləğlə artırılmalıdır... Əks halda yüksək maaş alanlar daha çox qazanır, fərq daha da böyüyür.”
Rasim Mustafayevin fikrincə, illərdir maaşların artmaması artıq izah olunmayan bir problemə çevrilib:
“Hər şeyin qiyməti qalxıb, amma maaş niyə qalxmır?”
Zaur Dadaşov isə daha sərt ittihamlarla çıxış edir və qurum daxilində ayrıseçkilik olduğunu bildirir:
“Mühəndislərə 30-50% artım, fəhləyə isə cəmi 9%... Bu, açıq diskriminasiyadır. Quldarlıqdır... nədirsə, adını siz qoyun!”
Sosial ədalət sual altındadır
Səsləndirilən fikirlərdən aydın olur ki, əsas narazılıq yalnız maaşların azlığı ilə bağlı deyil. İşçilər eyni zamanda maaş artımında tətbiq olunan fərqli yanaşmaların sosial ədalət prinsipinə zidd olduğunu vurğulayırlar.
Ekspertlərin fikrincə, uzun müddət əməkhaqlarının indeksləşdirilməməsi əmək bazarında motivasiyanın azalmasına, kadr axınına və ümumi istehsal keyfiyyətinə də mənfi təsir göstərə bilər.
Rəsmi mövqe hələ də yoxdur
Mövzu ilə bağlı indiyədək SOCAR və digər aidiyyəti qurumlardan geniş ictimaiyyəti qane edəcək açıqlama verilməyib. Bu isə narazılığın daha da artmasına səbəb olur.
Mövcud vəziyyət bir sıra ciddi suallar doğurur:
- Niyə illərlə maaşlar indeksləşdirilmir?
- Nəyə görə eyni müəssisə daxilində bu qədər fərqli yanaşma tətbiq olunur?
- Sosial ədalət prinsipi necə təmin olunmalıdır?
Neftçilərin səsləndirdiyi problemlər təkcə bir sahənin deyil, ümumilikdə əmək münasibətlərinin vəziyyətini əks etdirən ciddi siqnaldır. Məsələnin nə dərəcədə operativ və obyektiv həll olunacağı isə hələlik açıq qalır.
