Zirzəmidə çökən sistem: Binəqədidə aylardır davam edən kabus

Çox qorxulu dövrə daxil olmuşuq - görünən mənzərə dəhşət saçır və hər şey cəhənnəm vadisini xatırladır. Görünən odur ki, ölkə düşünülmüş və məqsədli şəkildə fəlakət girdabına sürüklənir, idarəetmə çöküb sanki. Əslində, bu, görüntü deyil, gerçəkliyin özüdür. Ötən yazıda da vurğulamışdım, yenə təkrar edirəm, qanun adına heç nə qalmayıb, dövlət ərkanının, məmur qürurunun yerlə süründüyü aşkar göz önündə.

İndi təsəvvür edin, kanalizasiya xəttinin dağılması səbəbindən (Binəqədi r., 7-ci mik., A.Kunanbayev küç., bina 14) aylardır çirkab sular birbaşa zirzəmiyə axır, üfunət dözülməz həddə çatıb, antisanitariya həyati təhlükəyə çevrilib, mənzildə yaşayış mümkünsüz hal alıb və bu iki dövlət məmurunun - Azərbaycan Dövlət Su Ehtiyatları Agentliyinin sədri Zaur Mikayılov, Binəqədi RİH başçısı Elxan Allahverdiyev və tabeçiliyində olan qurumlar (Binəqədi Sukanal idarəsi, Binəqədi MKTB, 80 saylı MİS) bütün bunları görməzdən gəlir, edilən müraciətlərə heç bir əhəmiyyət verilmir, sadəcə yalan vədlərdən savayı. Belə bir halda vətəndaş o düşüncəyə fokuslanır ki, o və təmsil olunduğu zümrə yalan vədlər üzərində idarə olunur.

Bu sual məni xeyli düşündürür: Adıçəkilən bu dövlət qurumlarının əməlində cinayət tərkibi varmı? Bunu hüquqşünaslar daha yaxşı bilər, amma məncə, var, həm də aşkar. Böyük bir zümrənin Dövlətə olan inamını qırmaq, Dövlətlə vətəndaş(lar) arasında vətəndaşlıq bağlarının qırılmasına səbəb olmaq, onlarda dövlət hakimiyyətinə qarşı düşünülmüş şəkildə ümidsizlik yaratmaq, xüsusən də binanın üfunət qoxuyan zirzəmisində kütləvi məzarlıq yaradıb, Dövlət qanunlarını fəsil-fəsil, maddə-maddə oraya gömmək əlbət ki, birbaşa cinayət əməlidir.

Bütün bunlardan sonra bu sayaq haqsızlıqla üzləşən vətəndaş ədalətli məhkəmə sisteminə necə inansın? Əgər, inansaydı cavabdeh qurumları verərdi məhkəməyə və məhkəmə də Dövlət adından Qərar çıxarıb həmin qurumları diz çökdürüb anasını ağladardı, dəymiş mənəvi ziyanı da birə min ödətdirərdi. Təəssüf və yenə təəssüf, hələ ki, bunlar reallıqda sadəcə bir xəyaldır.

(Son illər müşahidə etdiyim bu: Nisbət fərqiylə götürsək, Daxili İşlər Nazirliyindən savayı heç bir dövlət qurumu edilən müraciətlərə operativ reaksiya vermir - burada ədalət meyarı nə dərəcədə öz həllini tapır və ya tapmır, bununla işim yox).

XəzərNews.az